 |
| سحرتاب رومانی |
چار سو خاک اڑانے پہ لگا ہے
دل نیا جشن منانے پہ لگا ہے
میرے اشکوں کا سمندر ہے کہ اب بھی
دشت کی پیاس بجھانے پہ لگا ہے
بات اب بات بنانے سے بنے گی
تیر تو ٹھیک نشانے پہ لگا ہے
مہربانی ہے چراغوں پہ ہوا کی
حبس تو دیپ بجھانے پہ لگا ہے
وقت رکتا ہی چلا جاتا ہے لیکن
انساں رفتار بڑھانے پہ لگا ہے
سامنے اندھے سپاہی بھی کھڑے ہیں
چور بھی شور مچانے پہ لگا ہے
اک مصّور ہے کہ صدیوں سے مسلسل
تیری تصویر بنانے پہ لگا ہے
وہ سحر ساری شرارت ہی مری تھی
جس کا الزام زمانے پہ لگا ہے
-
ایک تبصرہ شائع کریں