غزل

اسی لیے مجھے اک گونہ راس ہے دنیا

جہان عام سہی دل کی خاص ہے دنیا

خود اپنے آپ کو مصروف کر لیا میں نے

یہ دیکھ کر کہ ترے آس ہاس ہے دنیا

رسد کے ساتھ طلب اور بڑھتی جاتی ہے

کبھی جو بُجھ نہیں پاتی وہ پیاس ہے دنیا

چھپا ۓ چھپتا نہیں اس کا داغ داغ بدن

اسی لیے تو بہت خوش لباس ہے دنیا

کسی کے ساتھ نہیں اور سب کے ساتھ بھی ہے

ہر ایک دور میں دنیا شناس ہے دنیا

مرا وجود تو دنیائے خواب میں ہے سعود

سو میں تو عکس ہوں اور انعکاس ہے دنیا

سعود عثمانی