غزل

میں خود کو دیکھتا ہوں آئینے کے باہر بھی

نظر میں ہے وہ جو رہتا ہے میرے اندر بھی

۔۔۔

میں سُن رہا ہوں جو کہتا ہے دل مرا مجھ سے

مری گرفت میں ہے دھڑکنوں کا منظر بھی

۔۔۔

فقط یہ خوف کا تیشہ نہیں ہے میرا عدو

مجھے تو توڑتا رہتا ہے میرا آزر بھی

۔۔۔

تمھاری آنکھ کے نیلم ہی کب ہیں در پئے قتل

ہیں ہونٹ نام کے دو سرخ رنگ خنجر بھی

۔۔۔

عجب ایلورا اجنتا ہے تیرا روپ سروپ

ہے شیر و شہد سے جل تھل بدن کی گاگر بھی

۔۔۔

پلا! کشیدہ ء آغوش وہ نفیس شراب

ہوں جس کے ذائقے مشکین اور معنبر بھی

۔۔۔

ہو آفتاب ادا میرا دل رُبا مسعود

مری شبوں کو جو کرتا رہے منّور بھی

۔۔۔۔۔۔۔۔۔۔مسعود منور