بیٹے کی سالگرہ پر ایک دعا

جس خاک سے اُٹھے ہو،اُسی خاک میں رہنا
اے جان ! مرے دیدہ ء نم ناک میں رہنا

پردیس کے خوش رنگ فریبوں سے نکل کر
کچھ دیر وطن کے خس و خاشاک میں رہنا

اِک جُرم ہے تا دیر جنم بھوم سے دوری
الزام ہے یوں قریہ ء چالاک میں رہنا

پنجاب کے دیہات کی دولت ہے نہ لٹ جائے
شیرینی ء دیرینہ رگِ تاک میں رہنا

اے جانِ پدر ، لختِ جگر اے مرے دلبند
جیوں عشق مرے سینہ ء غم ناک میں رہنا

لکھتا ہے دعا ، باپ تری سالگرہ پر
راس آئے تجھے مملکتِ پاک میں رہنا

مسعود منور