غزل

مَیں ناقصانِ رہِ کاملاں میں آخری ھُوں

گھسٹ رھا ھُوں کہ اِس کارواں میں آخری ھُوں

یہ میری خاک اُڑی ھی نہیں تدبر سے

پتہ بھی تھا اِسے مَیں رائگاں میں آخری ھُوں

کسی کا ھاتھ نہ آئے اگر سہارے کو

تو یہ کُھلے کہ صفِ ناتواں میں آخری ھُوں

حریصِ کشف سہی میرا حوصلہ تو دیکھ

کہ اِس اُمید گہِ سائلاں میں آخری ھُوں

یہ تیغِ خاص ابھی بے نیام کیوں کر لی

سنبھال اِسے مَیں صفِ دوستاں میں آخری ھُوں

یہ بُجھ رھا ھُوں کہ روشن ھُوا ھُوں جان تلک

مَیں جلتی بُجھتی ھُوئی کہکشاں میں آخری ھُوں

غزل صحیفہ ھے میرا مَیں خاتَمُ العُشاق

مَیں پہلے آ کے، صفِ عاشقاں میں آخری ھُوں

یہ شش جہت کوئی جلتا نشان مانگتے ھیں

مُجھے اُچھال مَیں آتش فشاں میں آخری ھُوں

کہاں ھیں نقشِ قدم اُس کے ، کون پہلا تھا

رضآ اگر مَیں یہاں لامکاں میں آخری ھُوں

رفیع رضا