 |
| مجید امجد |
برس گیا ' بَہ خراباتِ آرزُو ' تِرا غم
قدح قدح تِری یادیں' سبُو سبُو 'تِرا غم
تِرے خیال کے پہلو سے اُٹھ کے جب دیکھا
مہک رہا تھا زمانے میں کُو بہ کُو ' تِرا غم
غبارِ رنگ میں رَس ڈھونڈتی کِرن، تِری دُھن
گرفتِ سَنگ میں بَل کھاتی آب جُو ' تِرا غم
ندی پہ چاند کا پَرتَو ' تِرا نِشانِ قَدم
خطِ سَحَر پہ اندھیروں کا رقص' تُو ' تِرا غم
ہے جس کی رَو میں شگوفے' وہ فصل' تیرا دھیان
ہے جس کے لَمس میں ٹھنڈک' وہ گرم لُو ' تِرا غم
نخیلِ زِیست کی چھاﺅں میں' نَے بہ لب تِری یاد
فصیلِ دِل کے کلَس پر سِتارہ جُو ' تِرا غم
طلوُعِ مِہر ' شُگفتِ سَحَر ' سیاہئ شب
تِری طلب ' تجھے پانے کی آرزُو ' تِرا غم
نِگہ اُٹھی تو زمانے کے سامنے ' تِرا رُوپ
پلک جُھکی تو مِرے دِل کے رُو بَہ رُو ' تِرا غم
ایک تبصرہ شائع کریں